7 Jiyè 2021, 7 Janvye 2022

6 mwa, aprè asasina prezidan Jovenel Moïse,
otorite peyi Dayiti yo poko montre twòp enterè, ni volonte nan koze fè ankèt avanse ale wè pou bon limyè ta fèt sou krim nan jouktan pou jistis ta blayi.

Konsa tou anyen pako fèt pou 119 polisye ki tonbe pandan yo tap egzèse fonksyon yo ki se pwoteje ak sèvi.

Anyen pako di pou profesè Dorval ni Nety, ni jounalis Diego, ni ansanm ak latriye masak ak moun nan popilasyon an ki te viktim e kap Kontinye viktim jouk konya.

O kontrè nou wè se:kidnapin nan kap Kontinye, se ensekirite a kap vale teren, ak chantye yo ki kanpe menm sa ki pi vital yo tankou wout kafou jof ansafolè, wout ba Nòdwès yo espesyalman Pòdepè, Janrabel, Mol, Mawouj, Bonbad ak Bè de Èn.
Lopital yo ak santral elektrik yo.

Annreyalite se plis fè nwa ki blayi sou peyi a ak lavni popilasyon an espesyalman lakay jèn yo kap disparèt chak jou pi plis.

Pou tout rezon sa yo nap leve vwa nou byen wo poun kriye: Jistis san kanpe pou prezidan Jovenel Moise.

Jistis pou tout moun ki viktim de zak enjistis sou yon fòm ou yon lòt.

Yon leta san jistis ak yon jeng se 50 kob ak de gouden kole.

Aprè plis pase 218 lane briganday nan goumen youn kont lòt.

Dessaline an fas Petion / Petion an fas Dessalines.
Lè a rive poun mennen konba pou Ayiti delivre a, ak lòt estrateji. Tankou: on konplo pozitif an favè Nasyon an kote tout klas yo va travay pou nou akouche ” Le Rêve Haitien” (The haitian dream) pou nou tout travay nan yon objektif komin kise byenèt kolektif la.

Nou menm kòm echantiyon mas la, kòm peyizan e kòm nèg, nou propoze pou nou finalman jwenn yon antant ak tout sitwayen ki abite tè Dayiti
Kel te nèg tè lafrik, Kel te milat, kel te arab, siryen, libanè ak latriye.

Lè a rive poun fon konba kote tout enterè yo garanti paske nou tout se Ayisyen e nou tout gen menm dwa.
Nou dwe rive rekonet ke moun ki konpoze popilasyon an se nou tout e nou tout kelkeswa koulè nou ak orijin nou dwe sikile, travay ak kreye richès nan tout 27500 km kare a san diskriminasyon, san kè sote men nan lapè ak sekirite.

Aprè 218 lane batay extremis lan echwe. Ying yiang lan dwe fini e se konya menm poun antre nan lè viv ansanm nan
Nan mestisaj sosyokiltirel, ekonomik ak politik la.

Rete batay medyatris / santris la, goumen youn pou lòt la. Nan kad yon antant ganyan ganyan.

Se sèlman lè Ayiti genyen ke pèp Ayisyen ap genyen.
Provèb la di: Yon vye antant pi bon ke yon gwo pwosè.

Viv yon antant nasyonal san fòs kote ant tout nasyono yo. Viv ansanm ant Nèg -Milat-siryen-libanè ak tout lòt yo se dènye zèl kat la.

Viv nasyon Ayisyèn ini ak solidè
Viv Solidarite antre nou tout

Haiti Solidaire

Wisly LORFILS
Lidè NOUS-kotakot